علي الناصر
هذا المثل جنة نسمع بيه وياما دار الراس وافتر حتى نعرف شنو معناه وماكدرنه نتخيل شلون الحامي يصير حرامي ... ما ترهم بعرضي ما ترهم .. لكن كبرنة وشفنه . وهم افتر راسنه .. معقولة واحد عنده امانة وياكل منوراه رزق حلال طيب ويخونه ويوكل اطفاله من سحت وحرام .. لاحول ولا قوة الا بالله .
مرة كبل حوالي اربعين سنة واكثر اشوية _ ايه عمكم عمر تفكه _ مراجعة بمديرية الزراعة وجان تعلك بين موظف ومراجع والحجي فشك والدنيا التمت وجيب ضراط اليفتهم هوسة وصياح ومدافع . ما طولها عليكم ورة ساعة افتهمنا الفلم جانت كبل الافلام الهندية تارسه السينمات – ها نسيت هواية من الشباب ماشايفين سينمات . يابة السينما شاشة شنو شاشة عمي حايط مصبوغ ابيض لو بردة قماش بيضة يعرضون عليه فلم من مكينه جبيرة ايه على كل .
الفلم اكو مراجع واكفة معاملته ومنا منا ذب له ابو الخمسة بمجر الموظف وهذا الموظف عاط بيه شلون تذب . صدك ماكلتلكم ابو الخمسة شنو , ابو الخمس دنانير اي جان الدينار الواحد يعادل حوالي اربع دولارات ولو ماجنة نعرف الدولارات وكتها . ها يابة . ايه شلون تهيني واني موظف اخذ راتب من الدولة اتريد اخون واجبي بخمس دنانير ؟ شكول لاولادي جبت الكم برتقال من رشوة الاخ ؟؟ شكول النفسي من اوكف جدام المراية ؟؟ وفوك كل هذا شاكول لربي . وهو لاعن الراشي والمرتشي . اليوم لو انت لو اني . المهم بعد شنو اللي صار ماكملنه الفلم كملنه معاملتنا وشلعنا .
هذا ما يعني ما جانت اكو رشوة لا بس جانت اكو ضماير حية ومخافة الله واحترام الواجب وصون الامانة .
واليوم شنكول شنسولف ومنين نبدي ؟؟ الصدك حيره .. وهواي راح يزعلون لا ويسبون .. ما يهم سبوا وازعلوا .. بس كبل هاي ليش متعبين نفسكم ومتحملين المشقة وصايمين ها للرياء حقكم صوموا بويه واصلة لذاك الصوب . والمحابس هاي انوب اربعه اربعة .. شلون بدل الاقلام .. ايه .. من جانت ايام العز معلكات على الجتف ابدلة الزيتوني .. اشحلاتها .
ايبين طولت واخذني الواهس . ايه احنة ماعدنه غير نهذي ونخربط بس مانعرف نشتغل ونخمط
لهذا الفكر كاتلنه والحسد والغيرة مخليتنه نركض وره هذا وره ذاك .. هو ياهو شجلبت ؟؟؟
ها . يابة عندك محافظة بغداد هايابة والنوب مجلس محافظة بغداد وفوكاهن امانة العاصمة لو هي امانة بغداد... عيب ادري ولبن امي ... امتيه .
هاي بيها اجحنتية مال الاول يخمطون خمط . كلي شلون ؟ ها كلت لي .. المقاولة من ترسي على خادمكم مثلا مثلا ( احلم ) يتقدمون الربع بيك لو بالدارة تنيطينه لو انخربها .. بويه شنطيكم ؟؟ الك التنفيذ الفني والنة الهندسي مدري شيسمونه . وهاي طبعا وين تنحصر ايه ... لا ما اكول .. عود اكول يم المهندسين ورئيس المهندسين لالالالا لو معاون مدير عام لالالا كول بمكتب السيد فلان او المستشار للسيد علوان ايه حسب العائدية . ها هاي غير العزايم وسد الحلوك ايه لو تنطي لو افتن عليك . بس المصيبة من تكعد تسمع الحجي يبجوك تقوى وايمان والك الله يالوطن يالمسكين .
هناك تعليق واحد:
بعرررررررررررررررررضي ضحكتني
مراقب
إرسال تعليق