فلش وكل خستاوي
الملا عبود الكرخي
بغداد مبنية بتمر فلش وكل خستاوي
بغداد مبنية بتمر ما ينكضي هذا العمر
يهواي دبرلي الامر التين اصبح لاوي
بغداد مبنية بلقم وترابها سسي وبطم
للطم على راسي لطم وانحر على المناوي
بغداد مبنية بزبد خلاني اتمرمر واكد
اني صرت مثل العبد والسيد (كريزاوي)
بغداد مبنية بخرك وانهارها تجري عرك
من هالامر كلبي احترك صار الشغل بداوي
فلش واكل تين ورطب واخلط التفاح وعنب
يا هل خلك كلبي انعطب بالنار من (عتاوي)
فلش وكل مركة هوه ومن التمر سهمي النوه
جلدي على عظمي التوه من طب) ابو نجاوي*
( (* اسم الدلع لأبو ناجي – أي الانكليزي)
بغداد مرشوشة بعسل واحجارها ثوم وبصل
والماي في دجلة وصل (هذا الكيش حلاوي)
اني صرت شايل حمل ومن اللبس حظي سمل
والتمر بالبصرة زبل لا سيما الخضراوي
(برحي والبريم ودكل) ما ينفعك شغل النخل
بابوجي من جلد الصخل والاجنبي فرنساوي
(بربن وزهدي واشرسي) طعمه ابد ما ينسي
الفلاح ابد ما ينكسي من) الحشف والحلاوي)
الاجنبي نهبني نهب وماطلني بالزور وكذب
فرهد الحنطة والشلب والتمن الخضراوي
فرهدلي صوفي والدهن وسهمي من الزرع التبن
خاف احجي وضمني السجن اومي ومي صنطاوي
فلش وكل خستاوي
ليست هناك تعليقات:
إرسال تعليق